Timau

Mae’r Ganolfan Ryngwladol Cydlynu Iechyd (CRCI) yn rhaglen waith unigryw yng Nghymru gyfan, sy’n dwyn ynghyd yr holl Fyrddau Iechyd ac Ymddiriedolaethau’r GIG. Mae’n hyrwyddo ac yn hwyluso partneriaethau iechyd rhyngwladol, gan weithredu fel canolbwynt ar gyfer rhannu gwybodaeth, cyfnewid gwybodaeth, cydweithredu a rhwydweithio ledled y DU, Ewrop a’r byd.

Mae’r Uned BeSci yn darparu arbenigedd ar wyddor ymddygiad, ac yn hyrwyddo ac yn galluogi ei chymhwyso’n gynyddol fel mater o drefn, i wella a diogelu iechyd a llesiant, a lleihau anghydraddoldebau iechyd yng Nghymru. Mae’r Uned yn cefnogi rhanddeiliaid yn y system iechyd y cyhoedd ehangach, i gyflawni newid sylweddol wrth wella canlyniadau iechyd a llesiant.

Mae’r tîm Polisi’n cynhyrchu, yn cyfosod ac yn cyfathrebu mewnwelediad sy’n seiliedig ar dystiolaeth ac yn canolbwyntio ar weithredu yn effeithiol. Rydym yn defnyddio hyn i eiriol dros lunio polisïau sy’n diogelu ac yn hyrwyddo iechyd a llesiant pawb yng Nghymru, nawr ac ar gyfer cenedlaethau’r dyfodol. Rydym hefyd yn darparu cefnogaeth ac arbenigedd hanfodol i gydweithwyr ar draws y gyfarwyddiaeth ac Iechyd Cyhoeddus Cymru ar eiriolaeth polisi ac ymateb i ymgynghoriadau polisi.

Mae Uned Gymorth Asesu’r Effaith ar Iechyd Cymru yn darparu gwasanaeth Cymru gyfan ac yn rhoi arweiniad, hyfforddiant, adnoddau, gwybodaeth a rhwydweithio mewn perthynas â phob agwedd ar Asesiadau Effaith ar Iechyd.

Mae’r Hwb Iechyd a Chynaliadwyedd yn cefnogi ICC i ymwreiddio cynaliadwyedd ac ymateb i’r argyfyngau hinsawdd a natur. Rydym yn hyrwyddo Deddf Llesiant Cenedlaethau’r Dyfodol a Deddf yr Amgylchedd ac yn cefnogi blaenoriaeth strategaeth ICC sef “Mynd i’r afael ag effeithiau iechyd cyhoeddus newid hinsawdd”.

Sefydlwyd Canolfan ACE Cymru yn 2017 ac fe’i sefydlwyd i gefnogi cymdeithas Cymru i helpu i greu Cymru sy’n Ystyriol o Brofiadau Niweidiol yn ystod Plentyndod a gwneud Cymru’n arweinydd wrth fynd I’r afael â Phrofiadau Niweidiol yn ystod Plentyndod (ACE), eu hatal a’u lliniaru. Rydym yn hyrwyddo rhannu syniadau a dysgu, a herio a newid ffyrdd o weithio, fel y gallwn gyda’n gilydd dorri’r cylch ACE. Mae Canolfan ACE Cymru yn cael ei ariannu gan Lywodraeth Cymru a’i lletya gan Iechyd Cyhoeddus Cymru.

Wedi’i sefydlu yn 2019, mae Uned Atal Trais Cymru’n bartneriaeth rhwng Iechyd Cyhoeddus Cymru, Comisiynydd Heddlu a Throsedd De Cymru a Heddlu De Cymru. Mae pob sefydliad yn cyfrannu cyllid ac arbenigedd i gefnogi ymagwedd iechyd y cyhoedd system gyfan o atal trais, gan weithio’n agos gyda sectorau gan gynnwys iechyd, plismona, addysg, awdurdodau lleol, llywodraethau a’r trydydd sector.

Mae Uned Gydweithredu Iechyd Cyhoeddus, a sefydlwyd yn 2017 ac a leolir yn Ysgol Gwyddorau Iechyd Prifysgol Bangor, yn darparu adnodd hyblyg ac effeithlon ar gyfer cymorth ymchwil, gwerthuso a datblygu polisi i’r Gyfarwyddiaeth Polisi ac Iechyd Rhyngwladol a, drwy’r Gyfarwyddiaeth, i Iechyd Cyhoeddus Cymru a’r GIG ehangach.